Vilayət haqqının kürəkənə keçməsi
Ata kürəkənindən müəyyən qədər pul almaqla öz qızına olan vilayət (qəyyumluq, başçılıq) haqqını kürəkənə verə bilərmi?
Atanın vilayət haqqını kiməsə vermək mümkün deyil, nə pulla, nə də pulsuz.
Müvəqqəti nikahın iddəsində olan daimi nikah
Talaq verilmiş bir qadın, iddəsi bitəndən sonra müvəqqəti nikah bağlayır. Bir müddətdən sonra qohumların ağsaqqal və böyüklərinin vasitəçiliyi ilə birinci əri ilə evlənməsi qərara alınır. Qadın bunları ikinci ərinə bildirib çarə tapmasını istəyir. O, qalan müddəti bağışlayaraq təkrarən qadınla siğə bağlayır və duxuldan qabaq fəsx edir (nikahı pozur). Qadın isə ikinci fəsxin yaxınlıqdan öncə olmasını və yaxınlıq etməyənin iddəsi olmadığını dəlil gətirərək fasilə olmadan ikinci əri ilə evlənir. Bu mətləb səhihdirmi?
Qabaqkı nikahın iddəsi bu kimi işlərlə aradan qalxmır. İddə sona çatmamış onun yenidən evlənməsi səhih deyil və iddə saxlamadan heç bir kəslə nikah əqdi bağlaya bilməz.
Ehram əsnasında heyz olan qadınların vəzifəsi
Ümrədə ehram halında, ya ehramdan öncə, ya da ehramdan sonra heyz olan qadının vəzifəsi nədir?
Bu qadının ehramı hər bir halda səhihdir. Lakin pak olana qədər gözləməli, sonra təvafı və onun namazını yerinə yetirməli, sonra isə ümrənin digər əməllərini yerinə yetirməlidir.
Orucun kəffarəsinin qiymətinin meyarı
Ramazan ayının orucu şəriətə görə üzürlü səbəbdən (məsələn, xəstəlik və s.) açılarsa, kəffarəsinin məbləği nə qədərdir? Meyar yaşadığımış şəhərin qiymətidir, yoxsa yaşadığımız şəhəri nəzərə almadan, 750 qr. buqda, xurma və ya çörəkdir?
Meyar kəffarə ödənilən şəhərin qiymətidir. Onun miqdarı 750 qramdır. Onun qiymətini (pulunu) müstəhəqqə də (bunu almaq üçün lazım olan şərtlərə malik olan şəxsə) verə bilərsiniz. Bu şərtlə ki, bunu çörəyə xərcləyəcəyinə arxayın olasınız.
İranda yaşayan bəhailər
İran İslam Respublikasında yaşayan bəhailər izhar edirlər ki, biz İranın ümumi qanunlarına tabeyik və heç bir qanunsuz iş görmürük. Lakin burada hüquqlarımızın tapdanmasına dözməli oluruq. Sual budur ki, ümumiyyətlə bəhailər, xüsusilə də İranda yaşayan bəhailər əhli-zimmə sayılırlarmı?
Hazırkı şəraitdə bəhailiyin təkcə dini bir məsələ olmadığını, həm də siyasi məqsəd daşıdığını bilirik. Onların yadellilərin mənfəəti üçün fəaliyyət göstərdiklərinə dair çoxlu faktlar var. Bəzi qərb dövlətlərinin qanunverici orqanlarının onları ciddi şəkildə müdafiə etməsi buna əyani sübut ola bilər. Buna görə də belə bir şəraitdə onlara bu məmləkətdə dinc formada yaşamaq istəyən bir qrup kimi baxmaq olmaz. Onlar həqiqətdə muharibdən sayılır.
Tibb bacısının müharibə əlillərinə necə məhrəm olması
Mən İslam İnqilabı əlillərindən biriyəm ki, boyundan aşağı iflicəm və öz işlərimi görməyə heç cür qadir deyiləm. Bacılardan birinin Allah rizası üçün, cinsi məsələlərdən başqa bütün işlərimi görməyə razı olduğunu nəzərə alsaq, bizim məhrəm olmağımız üçün hər hansı bir yol varmı?
Əgər o qızla sizin atanızın arasında müvəqqəti əqd (qısa müddət üçün olsa belə) oxunsa, siz həmişəlik ona məhrəm ola bilərsiniz. Əlbəttə, həyat yoldaşı kimi deyil, ana-bacının məhrəmliyi kimi.
Yaxınlıq etmədən hamilə olan qadın
Bir kişi evlənmişdir, lakin hələ düxul (yaxınlıq) etməmişdir. Amma qadın, uşaqlıqda süni mayalanma yolu ilə hamilə olmuşdur. Talaqdan sonra mehriyənin vəziyyəti necə olacaqdır?
Əgər kişi qadının hamilə olmasına bais olmuşdursa, ehtiyat vacib budur ki, düxul etməsə belə mehriyənin hamısını ödəsin.
Məhcur olmayan borclu şəxsin müamiləsi
Məhcur olmayan borclu bir şəxs, borcdan qaçmaq məqsədi ilə öz əmlakını həqiqi, qeyri-müəvvəzi müamilə etsə, nafizdirmi?
Şəri hakimin hökmü ilə məhcur olmamışdırsa, müamilə batil deyil. Lakin haram bir iş görmüşdür.
Qadınların mənzildən kənarda ətirdən istifadə etmələri
Qadının ətirlənib evdən çıxması caizdirmi?
Müxtəlif hədislərdə bu əməli etmək qadağan olunmuşdur. Bəzi hədislərin zahiri mənasından isə bu işin haram olması başa düşülür.
İfrad həccində müfrədə ümrəni təxirə salmağın müddəti
Vəzifəsi ifrad həcci olan qadın, müfrədə ümrəni üzürlü səbəb olmadan nə vaxta kimi təxirə sala bilər?
Ehtiyat vacib budur ki, həcdən dərhal sonra yerinə yetirsin. Əgər təxirə salmağa məcbur olsa, Zih-həccə ayı başa çatmamış, yerinə yetirsin.
Məkkənin yeni məhəllələrində həcc ehramı bağlamaq
Məkkənin yeni salınmış məhəllərində qədim məhəllələr kimi həcc ehramı bağlamaq caizdirmi?
Maneəsi yoxdur, lakin ehtiyat vacib budur ki, hərəm xaricində yerləşən, Tən’im məscidindən sonra yerləşən məntəqələrdə ehram bağlanmasın.
İcarə müddəti bitəndən sonra icarəçinin ondan istifadəsi
İcarə müddəti sona çatandan sonra və əmlak sahibinin razılığı olmadan icarəçinin mağazadan və ya yaşayış mənzilindən istifadə etməsinin hökmü nədir? Halbuki İslam quruluşunun mədəni qanununda icarə verənin şəxsi ehtiyacı olmamaq şərti ilə istifadə haqqı icarə edənə verilir, hətta əmlak sahibinin razılığı olmasa belə.
Razılıq olmadan onun istifadəsi caiz deyil; yalnız zərurət və məcburiyyət qarşısında, özü də zərurət və məcburiyyətin təmin olduğu miqdarda olsa, eybi yoxdur.
Vəfat edəndən sonra dirilən həyat yoldaşının zövciyyət hökmü
Doğuş əsnasında dünyadan gedən qadın, sonradan Allahın pak zatına və İlahi övliyaya təvəssül etməklə dirilərsə, zövciyyəti (ər-arvad münasibəti) öz qüvvəsindədirmi?
Sualda fərz olunanlara görə zövciyyət (ər-arvad münasibəti) öz qüvvəsindədir.
Şiə kişinin əhli-kitabla evlənməsi
Şiə bir kişinin əhli-kitabdan olan yəhudi, nəsrani, erməni və s. qızla evlənə bilərmi?
Yalnız müvəqqəti evlənmək caizdir.
