Vilayət haqqının kürəkənə keçməsi
Ata kürəkənindən müəyyən qədər pul almaqla öz qızına olan vilayət (qəyyumluq, başçılıq) haqqını kürəkənə verə bilərmi?
Atanın vilayət haqqını kiməsə vermək mümkün deyil, nə pulla, nə də pulsuz.
Tibb bacısının müharibə əlillərinə necə məhrəm olması
Mən İslam İnqilabı əlillərindən biriyəm ki, boyundan aşağı iflicəm və öz işlərimi görməyə heç cür qadir deyiləm. Bacılardan birinin Allah rizası üçün, cinsi məsələlərdən başqa bütün işlərimi görməyə razı olduğunu nəzərə alsaq, bizim məhrəm olmağımız üçün hər hansı bir yol varmı?
Əgər o qızla sizin atanızın arasında müvəqqəti əqd (qısa müddət üçün olsa belə) oxunsa, siz həmişəlik ona məhrəm ola bilərsiniz. Əlbəttə, həyat yoldaşı kimi deyil, ana-bacının məhrəmliyi kimi.
Maşını şərikli surətdə almaq
Bir şəxs mənə bir qədər pul vermişdir ki, özümdə olan pulla birlikdə maşın alıb hər ay ona qazanc adı ilə müəyyən məbləğdə pul verim. Bu iş caizdirmi? Caiz deyilsə, onu şəri yolu necədir?
Müamilənin şəri şəkildə olması üçün bu formada əməl etmək lazımdır ki, maşının sözü gedən məbləğinin miqdarında pulu, pulun sahibinə təhvil verin, sonra onun maşından olan payını müəyyən məbləğə icarə edin. Hər iki tərəf üçün müddətin sonunda müamiləni pozmaq haqqı verilsin. Sözü gedən müamilə bu şəkildə əncam verilsə, səhihdir.
Ehram əsnasında heyz olan qadınların vəzifəsi
Ümrədə ehram halında, ya ehramdan öncə, ya da ehramdan sonra heyz olan qadının vəzifəsi nədir?
Bu qadının ehramı hər bir halda səhihdir. Lakin pak olana qədər gözləməli, sonra təvafı və onun namazını yerinə yetirməli, sonra isə ümrənin digər əməllərini yerinə yetirməlidir.
Namazların qəzalarını yerinə yetirməkdə acizlik
Mənim çox namazlarım qəza olmuşdur. Onların hamısını yerinə yetirməyə gücüm çatmır, vəzifəm nədir?
Keçmiş namazlarınızın qəzasını tədrici şəkildə, bacardığınız qədər qılın.
Şiə kişinin əhli-kitabla evlənməsi
Şiə bir kişinin əhli-kitabdan olan yəhudi, nəsrani, erməni və s. qızla evlənə bilərmi?
Yalnız müvəqqəti evlənmək caizdir.
Müvəqqəti nikahın iddəsində olan daimi nikah
Talaq verilmiş bir qadın, iddəsi bitəndən sonra müvəqqəti nikah bağlayır. Bir müddətdən sonra qohumların ağsaqqal və böyüklərinin vasitəçiliyi ilə birinci əri ilə evlənməsi qərara alınır. Qadın bunları ikinci ərinə bildirib çarə tapmasını istəyir. O, qalan müddəti bağışlayaraq təkrarən qadınla siğə bağlayır və duxuldan qabaq fəsx edir (nikahı pozur). Qadın isə ikinci fəsxin yaxınlıqdan öncə olmasını və yaxınlıq etməyənin iddəsi olmadığını dəlil gətirərək fasilə olmadan ikinci əri ilə evlənir. Bu mətləb səhihdirmi?
Qabaqkı nikahın iddəsi bu kimi işlərlə aradan qalxmır. İddə sona çatmamış onun yenidən evlənməsi səhih deyil və iddə saxlamadan heç bir kəslə nikah əqdi bağlaya bilməz.
Orucun kəffarəsinin qiymətinin meyarı
Ramazan ayının orucu şəriətə görə üzürlü səbəbdən (məsələn, xəstəlik və s.) açılarsa, kəffarəsinin məbləği nə qədərdir? Meyar yaşadığımış şəhərin qiymətidir, yoxsa yaşadığımız şəhəri nəzərə almadan, 750 qr. buqda, xurma və ya çörəkdir?
Meyar kəffarə ödənilən şəhərin qiymətidir. Onun miqdarı 750 qramdır. Onun qiymətini (pulunu) müstəhəqqə də (bunu almaq üçün lazım olan şərtlərə malik olan şəxsə) verə bilərsiniz. Bu şərtlə ki, bunu çörəyə xərcləyəcəyinə arxayın olasınız.
Pensiyaçıların puluna xüms düşməsi
Təqaüd (pensiya) puluna xüms düşürmü?
Təqaüdə çıxandan sonra dövlətdən aldığı pul, həmin ilin qazancı sayılır. Əgər o ilin xərclərindən artıq olsa, ona xüms düşür.
İfrad həccində müfrədə ümrəni təxirə salmağın müddəti
Vəzifəsi ifrad həcci olan qadın, müfrədə ümrəni üzürlü səbəb olmadan nə vaxta kimi təxirə sala bilər?
Ehtiyat vacib budur ki, həcdən dərhal sonra yerinə yetirsin. Əgər təxirə salmağa məcbur olsa, Zih-həccə ayı başa çatmamış, yerinə yetirsin.
Yaxınlıq etmədən hamilə olan qadın
Bir kişi evlənmişdir, lakin hələ düxul (yaxınlıq) etməmişdir. Amma qadın, uşaqlıqda süni mayalanma yolu ilə hamilə olmuşdur. Talaqdan sonra mehriyənin vəziyyəti necə olacaqdır?
Əgər kişi qadının hamilə olmasına bais olmuşdursa, ehtiyat vacib budur ki, düxul etməsə belə mehriyənin hamısını ödəsin.
Qadınların mənzildən kənarda ətirdən istifadə etmələri
Qadının ətirlənib evdən çıxması caizdirmi?
Müxtəlif hədislərdə bu əməli etmək qadağan olunmuşdur. Bəzi hədislərin zahiri mənasından isə bu işin haram olması başa düşülür.
Vəfat edəndən sonra dirilən həyat yoldaşının zövciyyət hökmü
Doğuş əsnasında dünyadan gedən qadın, sonradan Allahın pak zatına və İlahi övliyaya təvəssül etməklə dirilərsə, zövciyyəti (ər-arvad münasibəti) öz qüvvəsindədirmi?
Sualda fərz olunanlara görə zövciyyət (ər-arvad münasibəti) öz qüvvəsindədir.
Məkkənin yeni məhəllələrində həcc ehramı bağlamaq
Məkkənin yeni salınmış məhəllərində qədim məhəllələr kimi həcc ehramı bağlamaq caizdirmi?
Maneəsi yoxdur, lakin ehtiyat vacib budur ki, hərəm xaricində yerləşən, Tən’im məscidindən sonra yerləşən məntəqələrdə ehram bağlanmasın.
