مسئلہ 540 : اگر پانی نہ ملے یا میت کا بدن ایسا ہو کہ اس کو غسل نہ دیا جاسکتا ہو یا کسی بھی مجبوری کی وجہ سے اگرغسل نہ دیا جاسکتا ہو تو میت کو ہر غسل کے بدلے ایک تیمم دیں اس طرح کہ تیمم دینے والا میت کے روبرو بیٹھے اور اپنے ہاتھوں کو زمین پر مارے اور میت کے چہرے اور ہتھیلیوں کی پشت پرہاتھ پھیرے۔
مسئلہ 542 : لنگ ایسی ہو کہ ناف سے زانو تک تمام اطراف بدن کو چھپا سکے اور بہتر یہ ہے کہ سینہ سے پیروں تک پہونچ جائے اور بناء بر احتیاط واجب قمیص کاندھے سے آدھی پنڈلی تک تمام بدن کو چھپا لینے والی ہو۔ اور چادر بناء براحتیاط واجب اتنی لمبی ہو کہ سر اور پیروں کی طرف سے باندھنا ممکن ہو اور چوڑائی اتنی ہو کہ ایک طرف کا حصہ دوسری طرف ڈالا جاسکے۔
مسئلہ 543 : واجب اور مستحب کفن عرفا(دونوں)کو میت کے مال سے لیا جاسکتا ہے چاہے میت کے ورثاء میں نابالغ بھی موجود ہوں لیکن عرف سے زائد مقدار کو نابالغ کے حق سے نہیں لیا جاسکتا مگر یہ کہ میت نے وصت کردی ہو تو ایسی صورت میں زائد کو ایک تہائی سے لیا جاسکتا ہے۔
مسئلہ 544 : کفن کی مقدار واجب اور دیگر واجبات مثلا غسل، حنوط، دفن کے اخراجات کو اصل مال سے لیا جائے گا اس میں کسی وصیت کی ضرورت نہیں ہے اور اگر میت کے پاس مال نہیں ہے تو یہ اخراجات بیت المال سے کئےجائیں گے۔
مسئلہ 545 : عورت کا کفن شوہر کے ذمہ ہے چاہے عورت خود مالدار ہواور جس عورت کو طلاق رجعی دی گئی ہے اگر وہ عدت تمام ہونے سے پہلے مرجائے تو اس کابھی کفن شوہر کے ذمہ ہوگا۔
مسئلہ 546 : اگر میت کے پاس مال نہیں ہے تو رشتہ داروں پر اس کا کفن واجب نہیں ہے چاہے میت ان کی واجب النفقہ ہی رہی ہو لیکن اگر کوئی دوسرا ذریعہ نہیں ہے تو احتیاط واجب ہے کہ جس شخص پر میت کا نفقہ واجب تھا وہ میت کا کفن دے۔
مسئلہ 547 : احتیاط واجب ہے کہ کفن کے تینوں ٹکڑے اتنے موٹے ہوں کہ میت کا بدن دکھائی نہ دے۔
مسئلہ 548 : غصبی کپڑے میں کفن دینا جائز نہیں ہے چاہے کفن کے لئے کوئی دوسری چیز مہیا نہ ہوسکے اور اگر میت کو غصبی کفن دیا گیا ہو اور اس[کفن ] کا مالک راضی نہ ہو تو میت کے بدن سے اس کفن کا اتار لینا واجب ہے چاہے اس کودفن بھی کرچکے ہوں اور یہ ذمہ داری اس شخص کی ہے جس نے یہ کام کیا ہے اسی طرح مردار کی کھال اور نجس چیز میں بھی کفن دینا جائز نہیں ہے اور احتیاط واجب یہ ہے کہ خالص ریشمی کپڑے اور سونے کی تاروں سے بنے ہوئے کپڑے اور اس لباس میں جس کو حرام گوشت جانور کی اون اور بال سے بنایا گیا ہو کفن نہ دیں، لیکن اگر مجبور ہوں تو دے سکتے ہیں ۔
مسئلہ 549 : جانوروں کی کھال میں کفن دینا -چاہے وہ حلال گوشت حیوان کی ہو مجبوری کے علاوہ -محل اشکال ہے البتہ حلال گوشت حیوان کے اون اور بال سے بنے ہوئے کپڑے میں کفن دینے میں کوئی حرج نہیں ہے اگر چہ احتیاط مستحب یہی ہے کہ اس کو بھی ترک کردیں۔
مسئلہ 550 : اگر کفن کسی بیرونی نجاست سے یا خود میت کی نجاست سے نجس ہوجائے تو اس کو دھو لیں یا اگر کفن برباد نہ ہوتا ہو تو اس کو کاٹ دیں اور اگر یہ سب ممکن نہ ہو اور بدل سکتے ہوں تو کفن کو بدل دینا چاہئے۔
مسئلہ 551 : حج یا عمرے کا احرام باندھے ہوئے اگر کوئی مرجائے تو دوسروں کی طرح اس کو بھی کفن دیں اور اس کے سر اور چہرے کو چھپانے میں کوئی حرج نہیں ہے۔
احکام حنوط
مسئلہ 552 : غسل تمام ہونے کے بعد میت کو حنوط کرنا واجب ہے یعنی سجدہ کے ساتوں مقامات : پیشانی، دونوں ہتھیلیاں، دونوں گھٹنے، دونوں پیروں کے انگوٹھے پر کافور کا ملنا اور احتیاط واجب یہ ہے کہ تھوڑا(ٹھورا) کافور ان اعضا پر ڈال دیں۔کافور کو پاک، مباح اور تازہ ہونا چاہئے اس طرح سے کافور کي معمولي خوشبو اس ميں موجودهو۔